Poesia

Pane ’e fresa

Pro forros pro arados su rispettu
A sas mannais nostras mannu onore
Ch'imbentan pro massaju o pastore
Su pane a sas cussorzas pius perfettu

Pruavan e faghian trigu nettu
E lu pigavan a su molidore
Manizzu in sa farina cun amore
Impastu in gromentarzu poi suvettu

A canneddu in tazzelis istirada
Sa pasta traballada a fagher fresa
Cun inforrada e de nou inforrada

Essit tzaccurajolu in bonu gustu
Pro aunzare in monte oppuru in mesa
Cun casu, lardu, prosciuttu o arrustu.

Pinuccio Lai

Lampadas 2014